Тыдзень роднай мовы

21 лютага ва ўсім свеце адзначаецца Міжнародны дзень роднай мовы. З гэтай нагоды з 19 па 23 лютага ў каледжы прайшоў шэраг святочных мерапрыемстваў, якія мелі на мэце выхаванне маральных каштоўнасцей, усведамленне важнасці беларускай мовы, літаратуры і культуры для функцыянавання ў сучасным свеце, а таксама актывізацыю ведаў па роднай мове і літаратуры.

19 лютага ў бібліятэцы была ўладкавана выстава паштовак “Беларусь – мая Радзіма”. Навучэнцы прадставілі паштоўкі ўласнага вырабу, прысвечаныя беларускай літаратуры, архітэктуры і культуры. Усе жадаючыя маглі азнаёміцца з экспазіцыяй на працягу тыдня.

20 лютага з мэтай пашырыць цікавасць моладзі да роднага слова адбыўся выступ “Міжнародны дзень роднай мовы”. Ініцыятарам мерапрыемства выступіў актыў БРСМ і прафсаюзнага бюро навучэнцаў. Праграма прадугледжвала прэзентацыю аб гісторыі міжнароднага свята, а таксама міні-віктарыну па тэме выступу для замацавання набытых ведаў.

21 лютага навучэнцы 1 курса прынялі ўдзел у інтэлектульнай гульні “Паклон табе, мой беларускі краю!”. Юныя знаўцы спаборнічалі ў веданні мовы, літаратуры і культуры Беларусі. Па выніках турніру дыпломам І ступені была ўзнагароджана каманда “Жэўжыкі”, прадстаўленая навучэнцамі 493 групы. Дыплом ІІ ступені быў прысуджаны калектыву “Зоркі” 293 групы, а дыплом ІІІ ступені атрымала каманда “Валошкі” з групы 193.

22 лютага адбыўся конкурс тэатралізаваных пастановак “Неўміручая класіка”. Калектывы прадставілі сваё прачытанне класічных твораў беларускай літаратуры. Канцэпцыяй мерапрыемтсва стаў адказ на пытанне: “Што было б, калі б падзеі твора разгортваліся ў 2024 годзе?”. Рашэннем журы Гран-пры было прысуджана 193 групе. Дыплом І ступені атрымаў калектыў 493 групы, дыпломам ІІ ступені была ўзнагароджана 293 група, а група 393 стала ўладальнікам дыплома ІІІ ступені. Персанальныя ўзнагароды атрымалі Кудыціна Лідзія, Кіршанкова Аліна (у намінацыі “Лепшая жаночая роля”) Кабятка Дзяніс (у намінацыі “Лепшая мужчынская роля”) і Рассоха Злата (у намінацыі “Лепшая роля другога плана”).

23 лютага былі падведзены вынікі тыдня.

Інфармацыю падрыхтавала выкладчык цыклавой камісіі вучэбных прадметаў сацыяльна-гуманітарнага профілю А.Д. Баравая